ವುಹಾನ್‌ನಲ್ಲಿ ಮತ್ತೆ ಕೊರೊನಾ!; ನಿರ್ಬಂಧಗಳನ್ನು ವಿಧಿಸಿದ ಚೀನಾ

 

ಚೀನಾದಲ್ಲಿ ಬಹುತೇಕ ನಿಯಂತ್ರಣಕ್ಕೆ ಬಂದಿದ್ದ ಕೊರೊನಾ ವೈರಸ್ ಪ್ರಕರಣಗಳಲ್ಲಿ ಮತ್ತೆ ಏರಿಕೆಯಾಗುತ್ತಿದೆ. 1.10 ಕೋಟಿ ಜನಸಂಖ್ಯೆಯಿರುವ ನಗರದಲ್ಲಿ ಪ್ರತಿ ನಿವಾಸಿಯ ನ್ಯೂಕ್ಲಿಯಾಕ್ ಆಸಿಡ್ ಪರೀಕ್ಷೆಯನ್ನು ವ್ಯಾಪಕವಾಗಿ ನಡೆಸಲಾಗುವುದು ಎಂದು ವುಹಾನ್ ಅಧಿಕಾರಿ ಲಿ ತಾವೊ ಮಂಗಳವಾರ ತಿಳಿಸಿದ್ದಾರೆ. ಒಂದೂವರೆ ವರ್ಷಕ್ಕೂ ಹಿಂದೆ ಕೋವಿಡ್ 19 ಪ್ರಕರಣಗಳು ಮೊದಲು ವರದಿಯಾದ ವುಹಾನ್ ನಗರದ ಸಂಪೂರ್ಣ ಜನಸಂಖ್ಯೆಯನ್ನು ಪರೀಕ್ಷೆಗೆ ಒಳಪಡಿಸಲು ಚೀನಾ ಸರಕಾರ ನಿರ್ಧರಿಸಿದೆ.

ಈಗ ಮತ್ತೊಮ್ಮೆ ಲಾಕ್‌ಡೌನ್ ಸ್ವರೂಪದ ಕ್ರಮವನ್ನು ಚೀನಾ ಅಧಿಕಾರಿಗಳು ಕೈಗೊಂಡಿದ್ದು, ಇಡೀ ನಗರದ ನಿವಾಸಿಗಳು ಮನೆಯ ಒಳಗೇ ಇರುವಂತೆ ನಿವಾಸಿಗಳನ್ನು ನಿರ್ಬಂಧಿಸಿದ್ದಾರೆ. ನಗರದೊಳಗಿನ ಸಾರಿಗೆ ಸಂಪರ್ಕಗಳನ್ನು ಕಡಿತಗೊಳಿಸಿದ್ದು, ಸಾಮೂಹಿಕ ಪರೀಕ್ಷೆಗಳನ್ನು ಆರಂಭಿಸಿದ್ದಾರೆ.

ನಗರದಲ್ಲಿನ ಏಳು ಮಂದಿ ವಲಸೆ ಕಾರ್ಮಿಕರಲ್ಲಿ ಸ್ಥಳೀಯವಾಗಿ ಹರಡಿರುವ ಸೋಂಕು ಪತ್ತೆಯಾಗಿದೆ ಎಂದು ವುಹಾನ್ ಅಧಿಕಾರಿಗಳು ಸೋಮವಾರ ಪ್ರಕಟಿಸಿದ್ದರು. 2020ರ ಆರಂಭದಲ್ಲಿ ಕಠಿಣ ಲಾಕ್‌ಡೌನ್ ವಿಧಿಸುವ ಮೂಲಕ ಆಂತರಿಕ ಸೋಂಕು ಹರಡುವಿಕೆಯನ್ನು ನಿಯಂತ್ರಿಸಿದ ಸುಮಾರು ಒಂದು ವರ್ಷದ ಬಳಿಕ ಮತ್ತೆ ಅಲ್ಲಿ ಕೋವಿಡ್ ಸಂಖ್ಯೆ ಹೆಚ್ಚುತ್ತಿದೆ.

ವೇಗವಾಗಿ ಹರಡುವ ಡೆಲ್ಟಾ ತಳಿ ವೈರಸ್ ಅನೇಕ ನಗರಗಳಲ್ಲಿ ಕಾಣಿಸಿಕೊಂಡಿದ್ದು, ಮಂಗಳವಾರ 61 ಹೊಸ ಪ್ರಕರಣಗಳು ವರದಿಯಾಗಿವೆ. ನಂಜಿಂಗ್‌ನ ವಿಮಾನ ನಿಲ್ದಾಣದ ಸ್ವಚ್ಚತಾ ಕಾರ್ಮಿಕರಲ್ಲಿ ಸೋಂಕು ಪತ್ತೆಯಾಗಿದೆ. ಬೀಜಿಂಗ್ ಸೇರಿದಂತೆ ಅನೇಕ ಪ್ರಮುಖ ನಗರಗಳಲ್ಲಿ ಕಳೆದ ಕೆಲವು ದಿನಗಳಲ್ಲಿ ಲಕ್ಷಾಂತರ ಮಂದಿಯನ್ನು ಪರೀಕ್ಷೆಗೆ ಒಳಪಡಿಸಲಾಗಿದೆ.