ಕೊರೊನಾ ಲಸಿಕೆ ಸಾಗಣೆಗೆ ಡ್ರೋನ್

ನವದೆಹಲಿ, : ಶೀಘ್ರವೇ ಡ್ರೋನ್‌ಗಳನ್ನು ಬಳಕೆ ಮಾಡಿಕೊಂಡು ಕೊರೊನಾ ಲಸಿಕೆ ಸಾಗಿಸುವ ಕಾರ್ಯ ಆರಂಭವಾಗುವ ಲಕ್ಷಣಗಳು ಗೋಚರಿಸುತ್ತಿವೆ.  "ಕೊರೊನಾ ಲಸಿಕೆಗಳನ್ನು ದೂರದ ಪ್ರದೇಶಗಳಿಗೆ ಅಥವಾ ಕುಗ್ರಾಮಗಳಿಗೆ ಅತಿ ವೇಗವಾಗಿ ತಲುಪಿಸಲು ಡ್ರೋನ್‌‌ಗಳ ಬಳಕೆ ಮಾಡಿಕೊಳ್ಳುವ ಪ್ರಯತ್ನಗಳು ನಡೆಯುತ್ತಿವೆ. 

ಈ ಸಂಬಂಧ ಐಸಿಎಂಆರ್ ಸಹಯೋಗದೊಂದಿಗೆ ಅಧ್ಯಯನ ನಡೆಸಲಾಗಿದೆ. ಇದಕ್ಕೆ ಕೆಲವು ಮಾನದಂಡಗಳನ್ನು ಸೂಚಿಸಿದ್ದು, ಈ ಮಾನದಂಡಗಳ ಅನುಸರಣೆಯಾದರೆ ಲಸಿಕೆಗಳ ಸಾಗಣೆ ಪ್ರಾರಂಭವಾಗಬಹುದು" ಎಂದು ಐಐಟಿ ಕಾನ್ಪುರದ ವಕ್ತಾರರು ಭರವಸೆ ವ್ಯಕ್ತಪಡಿಸಿದ್ದಾರೆ.

ಐಐಟಿ ಕಾನ್ಪುರ ಹಾಗೂ ಇಂಡಿಯನ್ ಕೌನ್ಸಿಲ್ ಫಾರ್ ಮೆಡಿಕಲ್ ರಿಸರ್ಚ್ ಲಸಿಕೆ ಸಾಗಣೆಗೆ ಡ್ರೋನ್ ಆಯ್ಕೆಯ ಕಾರ್ಯಸಾಧ್ಯತೆಯ ಅನ್ವೇಷಣೆಗೆ ತೊಡಗಿಕೊಂಡಿದ್ದು, ವಿವರವಾದ ಅಧ್ಯಯನ ನಡೆಸಿ ಈ ಯೋಜನೆಗೆ ಮುಂದಾಗಿವೆ. ಅಧ್ಯಯನದಲ್ಲಿ ಸಕಾರಾತ್ಮಕ ಅಂಶಗಳು ಕಂಡುಬಂದಿದ್ದು, ಮುಂದಿನ ಹಂತವಾಗಿ ಐಸಿಎಂಆರ್ ಡ್ರೋನ್ ಕಂಪನಿಗಳೊಂದಿಗೆ ಒಪ್ಪಂದ ಮಾಡಿಕೊಳ್ಳಲಿದೆ.

ಈಗಾಗಲೇ ಟೆಂಡರ್ ಪ್ರಕ್ರಿಯೆ ಪ್ರಾರಂಭಗೊAಡಿದ್ದು, ಎಲ್ಲೆಡೆ ಇದನ್ನು ಮುಂದುವರೆಸಲಾಗುವುದು ಎಂದು ಬಲ್ಲ ಮೂಲಗಳು ತಿಳಿಸಿವೆ.

ಲಸಿಕೆ ಸಾಗಣೆಯಲ್ಲಿ ಬಳಸಬೇಕಾದ ಡ್ರೋನ್ ಕನಿಷ್ಠ 35 ಕಿ.ಮೀ ಹಾರಾಟ ವ್ಯಾಪ್ತಿ ಹಾಗೂ ನಾಲ್ಕು ಕೆ.ಜಿ ಹೊರುವ ಸಾಮರ್ಥ್ಯ ಹೊಂದಿರಬೇಕು. ಡ್ರೋನ್‌ಗಳ ತೂಕವು ಡಿಜಿಸಿಎ ನಿಗದಿಪಡಿಸಿದ ಮಾನದಂಡಗಳಿಗೆ ಅನುಗುಣವಾಗಿರಬೇಕು ಎಂಬ ಮೂಲ ನಿಯಮಗಳನ್ನು ಹೇರಲಾಗಿದ್ದು, ಈ ಎಲ್ಲ ಕಾರ್ಯಸಾಧ್ಯತೆಗಳನ್ನು ಪರಿಶೀಲಿಸಲಾಗಿದೆ.

ಡ್ರೋನ್ ಬಳಕೆಗೆ ನಾಗರೀಕ ವಿಮಾನಯಾನ ಸಚಿವಾಲಯದ ಅನುಮೋದನೆ ಅವಶ್ಯಕವಾಗಿದ್ದು, ಮೊದಲು ಐಐಟಿ ಕಾನ್ಪುರದ ಸಹಯೋಗದೊಂದಿಗೆ ಕಾರ್ಯಸಾಧ್ಯತಾ ಅಧ್ಯಯನ ನಡೆಸುವಂತೆ ಸೂಚಿಸಲಾಗಿದ್ದು, "ಕುಗ್ರಾಮದ ಜನರಿಗೆ ಲಸಿಕೆ ಶೀಘ್ರವೇ ಲಭ್ಯವಾಗುವಂತೆ ಮಾಡುವುದು  ಹಾಗೂ ಡ್ರೋನ್ ಮುಖೇನ ಲಸಿಕೆ ಕಳುಹಿಸುವುದು ಎಷ್ಟು ಸುರಕ್ಷಿತ ಎಂಬುದರ ಕುರಿತು ಜಂಟಿ ಅಧ್ಯಯನ ನಡೆಸಬೇಕು" ಎಂದು ಐಸಿಎಂಆರ್ ಹಾಗೂ ಐಐಟಿ ಕಾನ್ಪುರಕ್ಕೆ ಸಚಿವಾಲಯ ಸೂಚಿಸಿದೆ. ಏರೋಸ್ಪೇಸ್ ಇಂಜಿನಿಯರಿAಗ್ ಪ್ರಾಧ್ಯಾಪಕ ಎ.ಕೆ. ಘೋಷ್ ಮತ್ತು ತಂಡ ಯೋಜನೆಯ ಅಧ್ಯಯನ ನಡೆಸಿದ್ದು, ಯೋಜನೆಯ ಕಾರ್ಯಸಾಧ್ಯತೆ ಬಗ್ಗೆ ತಿಳಿಸಿದ್ದಾರೆ. ಡ್ರೋನ್‌ಗಳು ಬ್ಯಾಟರಿ ಚಾಲಿತವಾಗಿರುವುದರಿಂದ ಅದರ ತಾಪಮಾನವು ಲಸಿಕೆ ಮೇಲೆ ಪರಿಣಾಮ ಬೀರಬಹುದೇ ಎಂಬ ಕುರಿತು ಅಧ್ಯಯನ ನಡೆಸಲಾಗಿದೆ. ಈ ಎಲ್ಲಾ ಆಯಾಮದ ಸಂಶೋಧನೆಗಳ ಆಧಾರದ ಮೇಲೆ ತಂಡವು ಕೆಲವು ನಿಯತಾಂಕಗಳನ್ನು ನಿಗದಿಪಡಿಸಿದೆ. ಅವುಗಳನ್ನು ಅನುಸರಿಸಿದರೆ ದೂರದ ಸ್ಥಳಗಳಿಗೆ ಡ್ರೋನ್ ಮೂಲಕ ಲಸಿಕೆ ಸಾಗಿಸಲು ಸಾಧ್ಯವಾಗುತ್ತದೆ.