ಮೂರು ಡೋಸಿನ ಸ್ವದೇಶೀ ಝೈಕೋವ್-ಡಿ ಲಸಿಕೆ ಶೀಘ್ರವೇ ಮಾರುಕಟ್ಟೆಗೆ; ಇದು ಜಗತ್ತಿನ ಮೊದಲ ಪ್ಲಾಸ್ಮಿಡ್ ಡಿಎನ್‌ಎ ಲಸಿಕೆ

 

ಹೊಸದಿಲ್ಲಿ: ಜಗತ್ತಿನ ಮೊದಲ ಪ್ಲಾಸ್ಮಿಡ್ ಡಿಎನ್‌ಎ ಲಸಿಕೆ ಎನಿಸಿರುವ ತನ್ನ ಝೈಕೊವ್-ಡಿ ಲಸಿಕೆಯ ತುರ್ತು ಬಳಕೆ ಅನುಮೋದನೆ ನೀಡುವಂತೆ ಮತ್ತೊಂದು ಸ್ವದೇಶಿ ಸಂಸ್ಥೆ ಝೈಡಸ್ ಕ್ಯಾಡಿಲಾ ಮನವಿ ಮಾಡಿದೆ. ಮೂರು ಡೋಸ್‌ನ ಈ ಲಸಿಕೆಯು 'ಸೂಜಿ-ಮುಕ್ತ' ಮತ್ತು ಮಕ್ಕಳಿಗೆ ಸುರಕ್ಷಿತವಾಗಿದೆ ಎಂದು ಕಂಒಎನಿ ಹೇಳಿಕೊಂಡಿದೆ. ವರ್ಷಕ್ಕೆ 120 ಮಿಲಿಯನ್ ಡೋಸ್ ಲಸಿಕೆಗಳನ್ನು ಉತ್ಪಾದಿಸಲು ಕಂಪೆನಿ ಯೋಜಿಸಿದೆ. 

ಜಗತ್ತಿನಾದ್ಯಂತ ಅತ್ಯಂತ ವೇಗವಾಗಿ ಸೋಕು ಪ್ರಸಾರ ಮಾಡುತ್ತಿದೆ ಎನ್ನಲಾಗಿರುವ ಹಾಗೂ ಭಾರತದಲ್ಲಿ ಎರಡನೆಯ ಅಲೆಗೆ ಕಾರಣವಾಗಿರುವ ಡೆಲ್ಟಾ ಕೋವಿಡ್ 19 ತಳಿಯ ಹರಡುವಿಕೆ ಮಧ್ಯೆ ತನ್ನ ಮೂರನೇ ಹಂತದ ಪ್ರಯೋಗ ನಡೆಸಲಾಗಿದೆ. ಹೀಗಾಗಿ ಇದು ಹೊಸ ರೂಪಾಂತರ, ಮುಖ್ಯವಾಗಿ ಡೆಲ್ಟಾ ಪ್ರಭೇದದ ವಿರುದ್ಧವೂ ಪರಿಣಾಮಕಾರಿಯಾಗಿರುವುದನ್ನು ಖಚಿತಪಡಿಸಿದೆ ಎಂದು ಅದು ಹೇಳಿದೆ.

ಝೈಕೋವ್-ಡಿ ಲಸಿಕೆಗೆ ಅನುಮೋದನೆ ದೊರೆತರೆ ಭಾರತದ ಔಷಧ ನಿಯಂತ್ರಕ ಪ್ರಾಧಿಕಾರವು ಅಂಗೀಕಾರ ನೀಡಿದ ಐದನೇ ಲಸಿಕೆ ಎನ್ನಲಾಗಿದೆ. ಭಾರತದಲ್ಲಿ ಈಗಾಗಲೇ ಸೀರಂ ಇನ್‌ಸ್ಟಿಟ್ಯೂಟ್ ಆಫ್ ಇಂಡಿಯಾದ ಕೋವಿಶೀಲ್ಡ್, ಭಾರತ್ ಬಯೋಟೆಕ್ ಸಂಸ್ಥೆಯ ಕೋವ್ಯಾಕ್ಸಿನ್, ರಷ್ಯಾದ ಸ್ಪುಟ್ನಿಕ್ ವಿ ಮತ್ತು ಅಮೆರಿಕದ ಮಾಡೆರ್ನಾ ಲಸಿಕೆಗಳಿಗೆ ಅನುಮೋದನೆ ದೊರಕಿದೆ.

ದೇಶಾದ್ಯಂತ 28,000ಕ್ಕೂ ಅಧಿಕ ಸ್ವಯಂಸೇವಕರ ಮೇಲೆ ಬೃಹತ್ ಪ್ರಮಾಣದ ಪ್ರಯೋಗ ನಡೆಸಿದ್ದು, ಝೈಕೋವ್-ಡಿ ಸುರಕ್ಷಿತ ಹಾಗೂ ಪರಿಣಾಮಕಾರಿ ಎಂದು ತೋರಿಸಿದೆ. ಇದರಲ್ಲಿ 12-18 ವರ್ಷದ ಸುಮಾರು 1,000 ಮಕ್ಕಳು ಕೂಡ ಭಾಗವಹಿಸಿದ್ದಾರೆ ಎಂದು ಝೈಡಸ್ ತಿಳಿಸಿದೆ.

ಮೂರು ಡೋಸ್ ಲಸಿಕೆ:  ಝೈಕೋವ್-ಡಿ ಲಸಿಕೆಯು ದೇಶದಲ್ಲಿ ಈವರೆಗೆ ನೀಡಲಾಗಿರುವ ಎರಡು ಡೋಸ್ ಲಸಿಕೆಗಳಂತಲ್ಲ. ಇದು ಮೂರು ಡೋಸ್ ಹೊಂದಿದ್ದು, ಸೂಜಿ-ರಹಿತ ವ್ಯವಸ್ಥೆಯಲ್ಲಿ ನೀಡಲಾಗುತ್ತದೆ. ಲಸಿಕೆಯನ್ನು 2-8 ಡಿಗ್ರಿ ಸೆಲ್ಸಿಯಸ್‌ನಲ್ಲಿ ಸಂಗ್ರಹಿಸಲಾಗುತ್ತಿದೆ. ಆದರೆ ಕಳೆದ ಮೂರು ತಿಂಗಳಿನಿಂದ 25 ಡಿಗ್ರಿ ಸೆಲ್ಸಿಯಸ್‌ ತಾಪಮಾನದಲ್ಲಿಯೂ ಉತ್ತಮ ಸ್ಥಿರತೆ ತೋರಿಸಿದೆ. ಹೀಗಾಗಿ ಲಸಿಕೆಯನ್ನು ಸಾಗಿಸುವುದು ಸುಲಭವಾಗಿದ್ದು, ಕೋಲ್ಡ್ ಚೈನ್ ವ್ಯವಸ್ಥೆ ಕೆಡುವ ಸವಾಲುಗಳನ್ನು ತಗ್ಗಿಸುತ್ತದೆ ಎಂದು ಕಂಪೆನಿ ತಿಳಿಸಿದೆ.

ಪ್ಲಾಸ್ಮಿಡ್ ಡಿಎನ್‌ಎ ಲಸಿಕೆ : ಇದು ಪ್ಲಾಸ್ಮಿಡ್ ಡಿಎನ್‌ಎ ಲಸಿಕೆಯಾಗಿರುವುದರಿಂದ ವೆಕ್ಟರ್ ಆಧಾರಿತ (ಕೋಶವೊಂದಕ್ಕೆ ಡಿಎನ್‌ಎ ರವಾನಿಸಲು ಬಳಸುವ ವೈರಸ್ ಅಥವಾ ಇತರೆ ಅಂಶ) ಪ್ರತಿರಕ್ಷಣೆಗೆ ಸಂಬಂಧಿಸಿದಂತೆ ಝೈಕೋವ್-ಡಿ ಯಾವುದೇ ಸಮಸ್ಯೆ ಉಂಟುಮಾಡುವುದಿಲ್ಲ. ಪ್ಲಾಸ್ಮಿಡ್ ಡಿಎನ್‌ಎ ಲಸಿಕೆಯನ್ನು ನೀಡಿದಾಗ ಅದು ಕೊರೊನಾ ವೈರಸ್‌ನ ಸ್ಪೈಕ್ ಪ್ರೊಟೀನ್ ಉತ್ಪಾದನೆ ಮಾಡುತ್ತದೆ ಮತ್ತು ಪ್ರತಿಕರಕ್ಷಣೆ ಸ್ಪಂದನೆಯನ್ನು ಪ್ರಚೋದಿಸುತ್ತದೆ. ಪ್ಲಾಸ್ಮಿಡ್ ಡಿಎನ್‌ಎ ಅಂಶಗಳು ಹೊಸ ರೂಪಾಂತರಗಳನ್ನು ಎದುರಿಸಲು ಕೂಡಲೇ ಮಾರ್ಪಾಡು ಮಾಡಿಕೊಳ್ಳಬಲ್ಲವು ಎಂದು ವಿವರಿಸಿದೆ.