ಕೇಂದ್ರ ಸರಕಾರದ ಹೊಸ ಲಸಿಕೆ ನೀತಿ ಜಾರಿಯಾದ ಮೊದಲ ದಿನವಾದ ಸೋಮವಾರ (ಜೂನ್ 21) ದೇಶಾದ್ಯಂತ 86.16 ಲಕ್ಷ ಡೋಸ್ ಲಸಿಕೆಗಳನ್ನು ನೀಡಲಾಗಿದೆ. ಸರಕಾರದ ಕೋವಿನ್ ವೆಬ್ಸೈಟ್ನ ದಾಖಲೆಗಳ ಪ್ರಕಾರ ಸೋಮವಾರ ಒಂದೇ ದಿನ 86,16,373 ಕೋವಿಡ್ 19 ಲಸಿಕೆ ಡೋಸ್ಗಳನ್ನು ನೀಡಲಾಗಿದೆ. ಇದು ಈವರೆಗಿನ ಲಸಿಕೆ ಅಭಿಯಾನದಲ್ಲಿಯೇ ದಾಖಲೆಯ ಸಂಖ್ಯೆಯಾಗಿದೆ.
ಈ ದಾಖಲೆ ಮುರಿಯುವ ಲಸಿಕೆ ಕಾರ್ಯಕ್ರಮಕ್ಕೆ ಪ್ರಧಾನಿ ನರೇಂದ್ರ ಮೋದಿ ಸಂತಸ ವ್ಯಕ್ತಪಡಿಸಿದ್ದಾರೆ. 'ಇಂದಿನ ದಾಖಲೆ-ನಿರ್ಮಾಣದ ಲಸಿಕೆ ಸಂಖ್ಯೆಗಳು ಹರ್ಷದಾಯಕವಾಗಿವೆ. ಕೋವಿಡ್ 19 ವಿರುದ್ಧದ ಹೋರಾಟಕ್ಕೆ ಲಸಿಕೆಗಳು ನಮ್ಮ ಅತ್ಯಂತ ಪ್ರಬಲ ಅಸ್ತ್ರಗಳಾಗಿವೆ. ಲಸಿಕೆ ಪಡೆದುಕೊಂಡವರಿಗೆ ಅಭಿನಂದನೆಗಳು ಮತ್ತು ಹೆಚ್ಚಿನ ನಾಗರಿಕರು ಲಸಿಕೆ ಪಡೆದುಕೊಳ್ಳುವಂತೆ ಖಾತರಿಪಡಿಸಿಕೊಳ್ಳಲು ಶ್ರಮಿಸುತ್ತಿರುವ ಎಲ್ಲ ಮುಂಚೂಣಿ ಕಾರ್ಯಕರ್ತರಿಗೆ ಧನ್ಯವಾದಗಳು' ಎಂದು ಪ್ರಧಾನಿ ಮೋದಿ ಟ್ವೀಟ್ ಮಾಡಿದ್ದಾರೆ.
ಏಪ್ರಿಲ್ 2ರಂದು 42,65,157 ಡೋಸ್ ಲಸಿಕೆಗಳನ್ನು ನೀಡಿದ್ದು ಈವರೆಗಿನ ಅತಿ ದೊಡ್ಡ ದೈನಂದಿನ ದಾಖಲೆಯಾಗಿತ್ತು.
ದೇಶದಲ್ಲಿ ಮಂಗಳವಾರ 42,640 ಹೊಸ ಕೋವಿಡ್ 19 ಪ್ರಕರಣಗಳು ವರದಿಯಾಗಿವೆ. ಇದು ಕಳೆದ 88 ದಿನಗಳಲ್ಲಿಯೇ ಅತಿ ಕಡಿಮೆ ದೈನಂದಿನ ಪ್ರಕರಣವಾಗಿದೆ. ದೇಶದ ಒಟ್ಟಾರೆ ಪ್ರಕರಣಗಳ ಸಂಖ್ಯೆ 2,99,77,861ಕ್ಕೆ ಏರಿಕೆಯಾಗಿದೆ ಎಂದು ಆರೋಗ್ಯ ಸಚಿವಾಲಯದ ಕೋವಿಡ್ ವರದಿ ತಿಳಿಸಿದೆ.
ಸತತ 15ನೇ ದಿನ ದೈನಂದಿನ ಹೊಸ ಪ್ರಕರಣಗಳು ಒಂದು ಲಕ್ಷಕ್ಕಿಂತಲೂ ಕಡಿಮೆ ವರದಿಯಾಗಿದೆ. ಕಳೆದ 24 ಗಂಟೆಗಳಲ್ಲಿ 1,167 ಮಂದಿ ಕೊರೊನಾ ವೈರಸ್ ಸೋಂಕಿಗೆ ಬಲಿಯಾಗಿದ್ದಾರೆ. ಇದರಿಂದ ಒಟ್ಟಾರೆ ಸಾವಿನ ಸಂಖ್ಯೆ 3,89,302ಕ್ಕೆ ಏರಿಕೆಯಾಗಿದೆ.
ಇನ್ನೊಂದೆಡೆ 81,839 ಮಂದಿ ರೋಗಿಗಳು ಕಳೆದ 24 ಗಂಟೆಗಳಲ್ಲಿ ಸೋಂಕಿನಿಂದ ಚೇತರಿಸಿಕೊಂಡಿದ್ದಾರೆ. ಹೊಸ ಪ್ರಕರಣಗಳಿಗಿಂತ ಬಿಡುಗಡೆ ಅಧಿಕವಾಗಿರುವುದು ಇದು ಸತತ 40ನೇ ದಿನವಾಗಿದೆ. ಇದರಿಂದ ಸಕ್ರಿಯ ಪ್ರಕರಣಗಳು 6,62,521ಕ್ಕೆ ಇಳಿಕೆಯಾಗಿವೆ. ಈವರೆಗೂ ಒಟ್ಟು 2,89,26,038 ಮಂದಿ ಗುಣಮುಖರಾಗಿದ್ದಾರೆ.
ದೇಶದಲ್ಲಿ ಪಾಸಿಟಿವಿಟಿ ದರ ಶೇ 2.56ರಲ್ಲಿದೆ. ವಾರದ ಪಾಸಿಟಿವಿಟಿ ದರ ಶೇ 3.21ರಷ್ಟಿದೆ. ಸತತ 15ನೇ ದಿನ ಶೇ 5ಕ್ಕಿಂತ ಕಡಿಮೆ ಪಾಸಿಟಿವಿಟಿ ದರ ಇರುವುದು ಸಮಾಧಾನ ಮೂಡಿಸಿದೆ. ಸೋಮವಾರ 16,64,360 ಮಂದಿಗೆ ಪರೀಕ್ಷೆ ಪ್ರಮಾಣವನ್ನು ಹೆಚ್ಚಿಸಲಾಗಿದೆ.
0 Comments